Ұлттық спорт – бұл жай ғана дене жаттығуы емес, ол бабалар аманаты мен қазақ рухының айнымас көрінісі. Аттың жалында өскен, сайын даланың төсінде еркін көсілген халықтың мінезі мен қайраты дәл осы көкпардың шаңында, күрестің айласында, садақтың жебесінде сақталған. Әрбір ұлттық ойынның астарында терең философия мен тәрбие жатыр: тоғызқұмалақ – ақыл мен парасатты шыңдаса, асық ату – мергендік пен ептілікті, ал аударыспақ пен қазақша күрес – қайсарлық пен төзімділікті қалыптастырады. Ұлттық спорт күнінде біз тек өткенді ұлықтап қана қоймай, болашақ ұрпақтың бойына ұлттық кодты егіп, намысты оятуды көздейміз. Өз құндылықтарын қадірлеген елдің рухы әрдайым биік, мерейі үстем болады. Сондықтан төл өнерімізді төрге шығару – әрбір қазақ баласының қастерлі борышы. Көк туымыз көкте желбіреп, ұлттық намысымыз спорт алаңдарында асқақтай берсін.